秋冬季節，行山團天天出發。接近大自然是好事，但必須注意安全，量力而為。關於行山的意外，見報最多的地點肯定是飛鵝山。由九龍半島北望，除咗真係好似獅子的獅子山外，飛鵝山算係最多人認識。飛鵝山在九條龍（山脈）的最右邊，由九龍中西望去只是一條山脈的盡頭，然而由九龍東望去，或是一個獨立的四正大三角形，而且十分陡峭。山上最出名係自殺崖，睇相真係好牙煙，千祈咪帶小朋友上去。自己一直好想上去行轉，但近期常有意外事件，膽怯作罷。
想睇飛鵝唔一定上飛鵝山，今次介紹另一條方便易行的路徑，由另一角度欣賞靚山景。
-觀塘地鐵站出發，沿康寧道上樂華邨，轉入邨時右方有小路上山，山上為振華道晨運徑。沿晨運徑一路上山，途中可俯瞰整個觀塘區，很快便到達沈雲山山頂配水庫，有一大片草地俾小朋友放電。
-此處已可遠眺飛鵝，但仍有一段距離。沿大路朝飛鵝進發，盡頭處樹叢中有一條不大明顯的下山路，路較難行，小心帶着小朋友慢慢走。山路駁回石屎小路，向右走可到達佐敦谷水塘水壩，經過水壩走一段市民自己開發的山路，便會到達佐敦谷大草地，又係小朋友放電好去處。
-公園一端係順利邨出口，另一端可以行落牛頭角淘大。選牛頭角一邊，但選向上上平山的路，中途緊記穿過樹林，找一個可以飽覽整片大草地的高位，氣勢磅礡的飛鵝山就在對面！天氣好眼力佳的話，可以看到山上自殺崖一帶，有山友不停上上落落。
-上到平山頂，直行可落清水灣道，我們選左邊分叉路，行樓梯落九龍灣。途中高位可仰望飛鵝山、德望學校、獅子山一帶，又係開揚靚景。沿樓梯不段下降，日落時景色甚美。樓梯盡頭是彩德邨，可經彩霞邨、淘大返回九龍灣港鐵站結束旅程。
《觀塘＞佐敦谷INFO》
長度：約5km
需時：4小時
心水景點：平山遠眺飛鵝山（心曠神怡）
難度★★★☆☆（落山有小小難度）
推薦度★★★☆☆（適合一家大細）
