農曆年想行大運，通常都去行山。朋友住樂富，問有冇方方便便唔駛舟車勞頓簡簡單單就行個大運的地點？我話你有咁大個「靠山」——獅子山，都未帶仔女上過去？日望夜望獅子山頭，都未上過去？你有冇獅子山精神架？
-樂富港鐵站出發，沿橫頭磡南道，繞過德強苑，轉入富強街，抬頭便可見到獅子頭，富裕街盡頭有天橋橫過龍翔道，穿過天馬苑，有樓梯上獅子山郊野公園。
-在郊野公園入口旁邊，就有大大個牌寫住「獅子山」。準備好條氣，沿樓梯上，接上山斜路，半個鐘就到第一個晨運客開闢的觀景點，可以下望九龍及港島遠景。
-繼續向上行，好快就到更高望得更遠人更多嘅風雨亭。休息一陣，到戲肉，跟住指示牌上獅子山頂。呢段最斜，部份要手腳並用，唔好亂咁行就唔算危險。
-上到紅欄杆位，右轉就可以爬上獅子頭位置。事先聲明，獅子頭係好險要，三面係懸崖，而且假期時人好多，不適宜跳跳紥唔識死的細路上去。但身為香港人一世總要上去一次，感受吓大地在我腳下的獅子山精神。山唔算高，四百米左右，但市區大廈好近，一邊係九龍同港島，一邊係新界沙田，真係有登獅山而小天下嘅感覺。
-再講一次：假期真係太多人！所以唔留咁耐，落山走人。所謂「有咁耐上山，就有咁耐落山」，跟住就係無盡嘅梯級啦。梯級行完，右邊接麥徑行往沙田坳方向，可以選去觀音寺行去沙田，我地要出尖咀飲茶，就梗係中途轉入分叉路落沙田坳道，再去竹園搭巴士。完。
《樂富＞獅子山＞竹園INFO》
長度：約3.9km
需時：3小時30分鐘
心水景點：無敵獅子頭（大地在我腳下）
難度★★★★☆（懸崖峭壁要小心）
推薦度★★★★☆（不適合唔識死的細路）
