是日去粉嶺同皇太后飲茶，天氣先陰後晴，送咗老媽回老人院後，見到大藍天，忽然好想上山行個圈。由粉嶺可以搭小巴入鶴藪沿衛奕信徑逆行上八仙嶺，但六百米高挑戰太大實在不宜即興。上網睇地圖，發現粉嶺港鐵站附近有一條蝴蝶山行山徑，上到山頂瞭望台都係二百幾米，又可以屈返落華明邨搭巴士返藍田，時間高度難度都唔錯，坐言起行！
蓬瀛仙館右邊停車場小徑，有路牌寫住「蝴蝶山行山徑」，唔係太斜嘅斜路，即上。
經過好多山墳，睇實Ｄ細路唔好騷擾仙人。
一路上山，右邊已可遠眺北區風景。
經過「蝴蝶山行山徑」門匾，挑戰來了——石級上山。
上到中段，記住挨右邊山路去一去「無敵靚景後花園」，仲有塊「塵」大壁畫。
再上一段最長石級，到達涼亭，右邊再上最高點，樹木間有好多靚靚休憩處，右邊遠望上水高樓同北區農地，山路尾段落山去和合石或更遠的大刀刄，咪搞，折返。
返涼亭，由華明邨路牌落山。嘩！望住山下風景落成千級靚樓梯！我一定唔會由呢便行上來，傷心又傷膝，兼且無你咁好氣！
落樓梯時遇父子兩，兒子約莫五、六歲。爸爸指著山下如盒子的大廈，張開雙手大叫：「阿仔，大地在我腳下！」兒子開心大笑，跟著他做相同的動作。各位父母，假期唔好屈埋在家打機或者去冷氣商場行公司啦，帶仔女行下山，小朋友胸襟都廣闊啲！冇咁易睇唔開！
《蝴蝶山行山徑INFO》
長度：3.4km
需時：約2小時
消耗卡路里：356（華明邨食咗個梅扣肉飯，倒蝕）
心水景點：蝴蝶山瞭望亭（十足別墅後花園無敵景）
難度★★★☆☆（千祈咪由華明邨上，見倒條長樓梯好易調頭走）
推薦度★★★★☆（路易行，風景好）