阿仔考試，暫停一切活動。星期日好得閒，嫌在平地跑步太悶，想高高低低行吓山，但又唔想太累，屋企附近有冇短途路徑行吓呢？其實香港地少人多，郊區都多，行山徑更是又多又近民居，只要搵倒正確路線，想近近哋親近大自然一啲都唔難。家住藍田，其實隔個山後面就係西貢，山上面原來有條衞奕信徑第三段。查吓地圖，由港鐵站行上去，好近，一於出發。
-藍田港鐵站A出口，搭兩條長長的扶手電梯上啟田道。原來啟田道已經係衞奕信徑第三段嘅起點，要行馬路入油塘再上山，吸廢氣梗係唔好啦。抄小徑中途插入吧，經啟田商場、平田邨一直朝山方向進發，在德田邨旁搵到藍田公園入口。在公園內繼續向上行，去到藍田公園觀測台，空氣清新，可以休息一下。
-經過地母元君廟旁邊小路上山，以山上的航空導航反射器為目標，呢段梯級最考氣力。航空導航反射器係一塊豎起嘅大白板，細細個望上山成日見呢幾塊野，唔知同嚟做咩野，原來用來導航。反射器所在係五桂山山脊，亦係衞奕信徑第三段中途，剛好隔開東九龍同埋新界，右面可以望到整個將軍澳的景色。
-睇完風景沿衞徑向西貢出發，經過馬游塘，橫過寶琳路，進入翠琳路，中途便見到衞徑3的入口，離開馬路再次遁入山中，中途有疏落村屋和田園，風景優美。
-來到這裏小徑和小河的交叉點，前行便是清水灣井欄樹，再上便是飛鵝山一段。為免氣力不繼，選擇在此來一個V TURN，向下行經真的很小的小夏威夷瀑布，返回寶林邨，結束旅程，乘港鐵回家。
-此路線除了上山一段較吃力，全程都很好走，穿梭於屋邨和村屋之間，隨時可中途退隊，而且港鐵來港鐵走，十分方便，一家人來閒逛最好。
《藍田港鐵站＞寶林港鐵站INFO》
長度：約7km
需時：約3小時
消耗卡路里：1485（寶林邨飲杯台灣特飲，又打和）
心水景點：小夏威夷瀑布（真係好小）
難度★★★☆☆（真係唔難）
推薦度★★★☆☆（適合一家大細）
