香港咁多山，每個山都有山頂，但一話到上「山頂」，係人都知係上「太平山頂」，連遊客都知The Peak，大階P嘅Peak就係獨一無二，中外聞名嘅太平山頂。
山頂係遊客區，人多到爆，仲有咩野地方好行？其實想方便唔辛苦，帶仔女搭車上行山落，山頂上面有好多路徑可以選擇。例如由港島徑起點盧吉道繞山經夏力道行一圈，返巴士總站搭15巴士走；中途想挑戰可以上西高山（呢個兒童不宜），或落斜行克頓落西環香港大學站走；或另一邊落薄扶林水塘，都係好好走的平坦水泥路，兩邊又係密林，隨時望落山下風景好靚。
每年我都會上山頂行個大運，但今年出咗意外——車路大塞車，行人路大塞人，原來山頂廣場大翻新，得返凌宵閣一個場。想走？巴士小巴排晒長龍……點算？介紹大家一條最快由山頂落市區嘅路——舊山頂道。
-閃避所有國內同胞後，在凌宵閣旁左邊有路牌，包括直行的港島徑起點+盧吉邊，同埋公廁+舊山頂道，揀後者。落樓梯徑過公廁，已經可以望倒中環的大廈同一直落山的舊山頂道，記住回望凌宵閣打個卡，真係好似個火鍋。
-冇野好講，一直之字形路落山，條路好斜，真係好斜，年紀大的膝頭哥會痛，有人倒後行、之字形行，都係辦法。睇睇行山APP，半個鐘唔夠高度已落咗成百米，聽講以前係俾住山頂啲有錢外國人坐轎上山，辛苦晒啲轎夫。
-山路完，接馬路位左邊有個亭，可以坐一陣，打橫有條小路，原來叫「張保仔古道」，可以一路行過西環，但山路崎嶇，唔建議深入，行一小段睇吓風景就好返轉頭。
-沿舊山頂道繼續落，仲有一大段斜路，真係有行極唔完的感覺……最後終於去到動植物公園後門，行入去，腳板底先至真正感受返腳踏實地嘅幸福。休息一陣，沿花園道落返中環或金鐘，旅程正式完結。
《山頂＞中環INFO》
長度：約4km
需時：約2小時
心水景點：中環商廈
難度★★☆☆☆（落斜……真係好斜）
推薦度★★☆☆☆（總要落一次）
Updated 20 Jan
