行山係有益身心活動，但好多爹哋媽咪話怕仔女行得辛苦，其實小朋友一般都好鐘意跑來跑去，與其在室內PLAY HOUSE放電，不如跑上山。辛苦？係大人嘅藉口而已。今次介紹一條人人話辛苦，我覺得好適合帶埋小朋友一齊挑戰嘅超靚行山路徑——上大東山睇芒草 !
之前聽好多人話上大東山好辛苦，唔敢上，但係又心思思想睇下芒草，見人打卡相真係好羨慕…… 最近終於的起心肝，一償心願。其實條路唔難行，我覺得帶小朋友行都OK，反而大人身重又要孭野會辛苦D。呢度同大家分享下＞＞＞
-搭港鐵入東涌，行去昂平360旁邊巴士總站，搭任何一架去大嶼南的巴士，建議搭去梅窩果架3M，最少人，去大澳同昂坪的路線都得，雖然車密D，但無謂同人迫啦。
-上東涌路斜路差不多到盡頭的伯公坳站落，千祈咪過站，過咗就落山變咗去長沙玩……落車後行上小小就見鳯凰徑入口，對面馬路就係上鳯凰山(下次先)。
-一條路上山，起初有樹蔭，好舒服，穿過樹林上到山脊，無遮無掩，辛苦就慢慢行。行吓透吓記住轉身望吓風景＞望返落長沙南中國海無敵海景，對面鳯凰山氣勢磅薄(有D誇)….
-差不多一個鐘後，中途就見好多芒草打卡點，離山頂不遠。上山頂有好多條小路，揀咗一條有舊大石景點的又可以打吓卡。不過帶小朋友就最好兜遠小小行正路啦。
-上到山頂，真係「登泰山而小天下」，向北成個機場望晒，天氣好向東可以望到香港島….咁辛苦先上到來唔捨得走…但記住落山需時，太陽都斜斜地…..
-經過一堆石屋後，兩條路走，一係繼續逆行鳯凰徑落南山梅窩，一係由黃龍坑返東涌。前者有一班好嘈的男女在前面頂住，所以揀咗後者。
-估唔到最辛苦係落山呢段…..黃龍坑郊遊徑係出名「傷膝」徑，不段落山路同石梯，好似冇盡頭咁….無計，自己揀頂硬上….落先啱….
-個幾鐘頭後先落返平地，行返東涌市中心，天已黑齊….發誓呢世都唔會由呢便上山……不過都係一次好經驗來的:>
-全程要行成五個鐘未計停留時間，中間打卡位甚多，所以記住愈早上愈好:>
《東涌＞大東山＞東涌INFO》
長度：約7km
需時：約5小時
心水景點：山頂芒草
難度★★★★☆（路途較長）
推薦度★★★★☆（總要上一次）
